Արժե՞ երեխաներին կոնտակտային լինզաներ կրել. news.am

Կոնտակտային լինզաները մի շարք պատճառներով ավելի հարմարավետ են համարվում, քան ակնոցը: Գլխավոր պատճառներից մեկն այն է, որ նրանք ավելի մեծ տեսադաշտ են ապահովում եւ որոշ առումներով ավելի անվտանգ են: Սակայն արժե՞ տեսողության հետ խնդիրներ ունեցող երեխաներին ակնոցի փոխարեն լինզաներ կրել:

Շատ մասնագետներ կարծում են, որ դա ցանկալի չէ: Ինչպես ակնաբույժ Անի Համբարձումյանն է բացատրել, պատճառներից մեկն այն է, որ լինզաները լուրջ խնամք են պահանջում, իսկ երեխաներից շատերն այդ խնամքը ի վիճակի չեն ապահովել:

Մասնավորապես, լինզաները դնելիս եւ հանելիս շատ կարեւոր է ձեռքերը լվանալ եւ խստորեն պահպանել հիգիենայի բոլոր կանոնները, հակառակ դեպքում կեղտոտ ձեռքերի պատճառով աչքերի մեջ կարող են վտանգավոր մանրէներ ներթափանցել եւ լուրջ վարակներ առաջացնել:

Բացի այդ, շատ կարեւոր է նաեւ պատշաճ կերպով պահպանել լինզաների հեղուկի մաքրությունը, քանի որ այն նույնպես կարող է վարակի աղբյուր դառնալ:

Երեխաների համար հիգիենայի այդ բոլոր կանոնները պահպանելը բավական բարդ եւ խնդրահարույց է, այդ իսկ պատճառով, շատ մասնագետներ խորհուրդ չեն տալիս երեխաներին լինզաներ կրել. աչքի վարակ ձեռք բերելու ռիսկերը բավական բարձր են: Սակայն, եթե երեխան կոկիկ է եւ ուշադիր ու կարող է հետեւել հիգիենայի բոլոր կանոններին, լինզաները նրան հակացուցված չեն, սակայն լինզաներ օգտագործելուց առաջ պետք է անպայման խորհրդակցել ակնաբույժի հետ:

Հարցեր, պատասխաններ, մեկնաբանություններ